मनहरीमा एक सय २० घरलाई खाद्यान्न सहयोग

सिधाखबर \ दैनिक ज्यालादारी गर्ने तथा सिमान्तकृत जाती चेपाङ बोटे र तामाङ जातका १२० परिवारलाई खाद्यान्न सहयोग गरिएको छ । शुक्रबार मनहरी गाउँपालिका वडा नम्बर ६ सुनाचुरी, डिपाड नयाँबस्तीमा १२० परिवारलाई इस्थर बेन्जामिन स्मृति संस्था मकवानपुरले खाद्यान्न सहयोग गरेको हो ।

कोरोना महामारीबाट प्रभावित परिवारका लागि केहि सहज होस भन्ने हेतुले चामल, नुन, चना, तेल साबुन लगायतको सामाग्री सहयोग गरिएको इस्थर बेन्जामिन स्मृति संस्थाका कार्यक्रम व्यवस्थापन प्रमुख बुद्धवीर लामाले बताए । डिपाडमा रहेको जनजाती उत्थान प्रावि परिसरमा ४० परिवारलाई र राष्ट्रिय माध्यामिक विद्यालय सुनाचुरीमा ८० घरपरिवारलाई खाद्यान्न वितरण गरिएको वितरण कार्यक्रम संयोजक हरि बहादुर लोप्चनले बताए ।

कार्यक्रममा विद्यालयका अध्यक्ष भक्त बहादुर प्रजा, समाजसेवी नारायण श्रेष्ठ, बाबुराम थिङ, कमल थिङ, स्मृति संस्थाका सानुकान्छा लामा, दिनेश हुमागाई तथा सञ्चारकर्मीको उपस्थिती रहेको थियो । संस्थाले यस अघि खैराङमा चेपाङ तथा तामाङ परिवार र हेटौंडामा विभिन्न श्रमिकहरुलाई खाद्यान्न सहयोग गरिसकेको छ ।