चेपाङ बस्ती खैराङमा खाद्यान्न वितरण

 खबरबाकस \ चेपाङहरुको बसोबास भएको मकवानपुरको विकट गाउँपालिका राक्सिराङ गाउँपालिकाको वडा नम्बर ९ खैराङमा राहत वितरण गरिएको छ । कोरोना महामारीका कारण खाद्य संकट भएपछि नेपाली कांग्रेस मकवानपुरले गाउँपालिकालाई हस्तान्तरण गरिएको खाद्यान्न चामल, दाल, नुन मसला एक हजार घरपरिवारलाई वितरण गरिएको हो ।

विकट खैराङमा ५५२ घरधुरी कांग्रेसले पठाएको खाद्यान्नमा इस्थर बेन्जामिन स्मृति संस्थाले पनि चामल सहितका अन्य खाद्यान्न थप ३२० घरपरिवारलाई वितरण गरिएको हो । चेपाङ समुदायमा जंगलमा गिठ्ठा भ्याकुर र घरमा रहेको खाद्यान्न सकिएपछि खाद्य संकट भएको गाउँपालिकाका अध्यक्ष राजकुमार मल्लले बताउनुभयो । राक्सिराङको अतिनै गरिबी रहेका खैराङको छाप्राङ, तालिङटोल, च्याउराङ, अठारे, पार्सिङवाङका चेपाङ-तामाङ परिवार र वडा नम्बर ७ कांकडाका धिराङ दामराङ चरिमारा, खर्लिङ, गर्लिङका चेपाङ र तामाङलाई चरणबद्ध शुक्रबार देखि खाद्यान्न वितरण गरिरहेको अध्यक्ष मल्लले बताउनुभयो ।

विभिन्न सामाजिक तथा गैरसरकारी संस्थाहरुबाट प्राप्त भएका खाद्यान्नलाई चेपाङ तथा तामाङ परिवारलाई टोल सुधार समितिको सिफारिशमा खाद्यान्न वितरण गरिरहेको बताउनुभयो । खाद्य पदार्थमा मकै कोदो उत्पादन हुने राक्सिराङमा बढिमा ६ महिना सम्म उत्पादित खाद्यान्न प्रयोग गर्न पुग्दछ । ३७ प्रतिशत चेपाङ र ५२ प्रतिशत तामाङहरुको बसोबास रहेको राक्सिराङका चेपाङ-तामाङहरु दैनिक ज्यालादारी गर्न हेटौंडा, चितवन, काठमाडौं जाने गर्दछन् तर कोरोना महामारीले अहिले घरमा बस्नबाध्य रहेका छन् ।