बागमती प्रदेशसभा बैठक स्थगित

बागमती प्रदेशसभाको बैठक स्थगित भएको छ । दिउँसो ३ बजेका लागि बोलाईएको बैठक सूचना जारी गरेर स्थगित भएको हो ।

प्रतिपक्षी दलसंग सहमति विना बैठक बोलाईएको भन्दै प्रतिपक्षी दलले असहमति जनाएपछि बैठक आइतबार लागि सरेको नेपाली कांग्रेसका सचेतक छिरिङदोर्जे लामाले जानकारी दिनुभयो ।

बैठकमा सहमति जुटाउनु भन्दा अंकगणितीय हिसावले पेलेर लैजाने ढंगबाट सत्तापक्ष आएपछि प्रतिपक्षहरुले यसको विरोध गरेका थिए । बैठक सुचारु गर्न शनिबार मूख्यमन्त्री डोरमणि पौडेल, प्रमुख प्रतिपक्षि दलका नेता शालिकराम जम्कट्टेल, प्रतिपक्षि दल नेपाली कांग्रेसका नेता ईन्द्र बहादुर बानियाँ सहितको बैठकमा आइतबार बैठक संचालन गर्नेबारे छलफल भएको थियो ।

प्रदेश सरकारले आगामी आव ०७८/०७९ का लागि ल्याएको बजेटमा असन्तुलन रहेको, सरकारले संचारगृह चलाउन लागेको, विना पूर्वाधार विद्युतीय सवारी खरिद गर्न लागेको जस्ता विषयको विरोधमा प्रतिपक्षी दलले बैठक अवरुद्ध गर्दै आइरहेका छन् ।