कर्मचारीमा संक्रमण देखिएपछि महानगरको सबै सेवा बन्द

चितवन \ भरतपुर महानगरपालिकाको अति आवश्यक बाहेक सबै सेवा बन्द भएको छ । कार्यालयका कर्मचारीमा समेत कोरोना भाइरस  संक्रमण देखिएपछि आज (शुक्रबार)बाट अति आवश्यक बाहेक सबै सेवा बन्द गरेको हो ।

विहीबार बसेको नगरकार्यपालिकाको बैठकले वैशाख मसान्तसम्म अति आवश्यक सेवा (दमकल, सरसफाई, स्वास्थ्य र विपद् सम्बन्धी सेवा) बाहेक कार्यालयबाट प्रदान गरिने सम्पूर्ण सेवा बन्द गरिएको महानगरपालिकाद्धारा जारी सूचनामा उल्लेख छ ।

चितवनमा सबैभन्दा धेरै कोरोना संक्रमित भरतपुर महानगरपालिकामा छन् । यहाँ शुक्रबार विहान मात्रै ७२ जना संक्रमित थपिएका छन् । कोरोनाको दोस्रो लहर सुरु भएसंगै भरतपुर मात्रै विहीबार दिउँसोसम्ममा सक्रिय संक्रमितको संख्या एक हजार ४७८ पुगेको छ ।