अब केही दिनमै नयाँ सरकार गठन हुन्छ: प्रचण्ड

चितवन \  नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले केही दिनमै नयाँ सरकार गठन हुने दावी गर्नुभएको छ ।

आइतबार चितवनको माडीमा कार्यकर्तालाई सम्बोधन गर्दै प्रचण्डले केन्द्रमा नयाँ कायापलट हुने बताउनु भयो । उहाँले यो सरकार अब धेरै दिन नटिक्ने बताउनु भयो । उहाँले भन्नुभयो, ‘कर्णालीमा देखिहाल्नुभो । केही दिनभित्रै नयाँ समाचार सुन्नुहुनेछ ।’

वर्तमान सरकार निरङ्कुश र असंवैधानिक भएको भन्दै प्रचण्डले आफूहरु त्यसलाई ठेगान लगाउने अन्तिम तयारीमा रहेको बताउनु भयो । उहाँले भन्नुभयो, ‘कर्णाली सरकार अपदस्थ गर्ने केपी ओली र उनको गुटको दुस्साहसको के नतिजा निस्कियो, तपाई हामीले देखेका छौं । गण्डकीमा के हुँदैछ तपाईँ हामीले देखेका छौं र लुम्बिनी प्रदेशमा के हुँदैछ, तपाई हामीले देख्दैछौं ।’

केन्द्रमा पनि संसद विघटनविरुद्ध सडकमा गएका दलहरु मिलेर जनपक्षीय र मुद्दामा आधारित सरकार बनाउनुपर्ने उहाँको भनाइ थियो ।

प्रचण्डले चितवनबाट काठमाडौं गएलगतै दलहरुको बैठक बस्ने बताउँदै  अब केन्द्रमा पनि केहीदिनमा एउटा नयाँ कायापलट हुनैपर्छ, हुँदैछ, भन्नुभयो ।